د فراه ولایت د بخش اباد د بند پروژې د کار چټکتيا په موخه د همغږۍ ناسته تر سره شوه
د زمري 27 مه د دوشنبې ورځ، د اوبو د چارو د تنظیم ملي ادارې د عمومي رئيس او د انرژي خدماتو ادارې سرپرست، انجینر خان محمد تکل په رهبرۍ چې د دغه ادارې تخنیکي مرستيال انجینر احمد ویس بصیري، په ولسي جرګه کې د فراه ولایت د خلکو استازو،عبدالنصیر فراهي او عبدالغفار ارمان، همایون شهید زاده او د قراردادي شرکت مسؤلینو شتون درلود د فراه ولایت د بخش اباد د بند د پروژې د کار چټکتيا په موخه د همغږۍ جلسه تر سره شوه.
په دغه ناسته کې د بخش اباد بند پروژې د عملي کار په جریان او د هغه په چټکتيا خبرې وشوې.
د اوبو د چارو د تنظیم ملي ادارې عمومي رئیس د پروژې د ارزښت د يادولو تر څنګ د قراردادي شرکت مسؤلینو څخه وغوښتل چې خپل کاري پلان دې د اوبو د چارو د تنظیم ملي ادارې رهبري او د فراه ولایت د خلکو استازو سره شریک کړي او په سیمه کې دې د پروژې چارې چټکې کړي تر څو د څو مياشتو ځنډيدلي مودی کار جبران شي او بند په ټاکلې موده کې ګټې اخیستنې ته وه سپارل شي.
په ورته وخت کې د فراه ولایت د خلکو استازو د اوبو د چارو د تنظیم ملي ادارې او د قراردادي شرکت مسؤلینو ته ډاډ ورکړ چې د بخش اباد د بند ددپروژې د عملي چارو په چټکتیا کې هر ډول مرستې ته ژمن دي.
د بخش اباد د اوبو لګولو او بریښنا بند د 27 مېګاواټه بريښنا د تولید ارزښت، د 1364 میلیونه متر مکعب اوبو ذخیره کولو او د 68 زره هکټاره کرنیزې ځمکې خړوبولو ارزښت لري.
