د هلمند ولایت د کجکي بند د دوهم فاز پروژې قرارداد وڅېړل شو
د هلمند ولایت د کجکي بند د دوهم فاز پروژې د هر اړخیزې څېړنې په هکله د سترو قراردادونو د رهبري پلاوي ناسته ترسره شوه.
دغه ناسته د اوبو او انرژي وزارت د سرپرست وزیر محترم ملا عبداللطیف منصور تر رهبري لاندې د اوبو او انرژي وزارت د اوبو معین محترم مجیب الرحمن عمر آخندزاده، د کلیو پراختیا وزارت معین محترم مفتي سید احمد مستقیم، د اقتصاد وزارت معین محترم ډاکټر عبداللطیف نظري، د ټولګټو وزارت معین محترم عبدالکریم فاتح، د ملي تدارکاتو ریاست مرستیال محترم شیخ عبدالرحیم رحیمي، د ۷۷ ترکي شرکت د استازي محترم بوراک اونسال او د سترو قراردادونو د څېړنې پلاوي د تخنیکي ټیم په ګډون ترسره شوه.
په یاده ناسته کې د ټاکل شوې کمیټې راپور چې مخکې د رهبري پلاوي له خوا د نوموړي قرارداد د څېړلو په موخه ټاکل شوې وه، تر مطالعې لاندې ونیول شو او د قرارداد د بېلابېلو اړخونو تر هر اړخیزې څېړنې وروسته، د قراردادي شرکت له استازي سره د همغږي په موخه د ځینو شته ننګونو او ستونزو د هوارولو په هکله په بشپړه توګه بحث او د اندونو تبادله وشوه.
د رهبري پلاوي غړو او قراردادي شرکت استازي هوکړه وکړه چې د قرارداد د اړخونو او لا زیاتې مطالعې او په بېلابېلو عادي او غیر عادي حالاتو کې دهغې د پلې کولو په پار لا زیاتې څېړنې ترسره کړي، ترڅو په راتلونکي ناسته کې په دې اړه وروستۍ هوکړې ترسره شي.
