د هېواد په ۱۳ ښارونو کې د ځمکې لاندې اوبو سرچینو وضعیت تر څېړنې او شننې لاندې ونیول شول
د اوبو او انرژي وزارت د اوبو سرچینو عمومي ریاست د ځمکې لاندې اوبو سرچینو ریاست له خپل کلني پلان سره سم، په ۱۴۰۳ لمریز کال کې د هېواد په ۱۳ ښارونو کې د شته ارقامو پر بنسټ د ځمکې لاندې اوبو سرچینو وضعیت تر څېړنې او شننې لاندې ونیول.
د دغې شننې پایلې ښيې چې د کابل، مزار شریف، بامیان، هرات، میدان ښار او کندهار ښارونو کې د ځمکې لاندې اوبو بیلانس منفي دی او په دغو سیمو کې د ځمکې لاندې اوبو په کچه کې د پاموړ کموالی راغلی دی.
د اوبو او انرژي وزارت تخنیکي مسؤلینو د دغه وضعیت تر ټولو اړینو عواملو څخه د کرنې او صنعتي لګښتونو لپاره د ځمکې لاندې اوبو بېځایه را ایستل او د تغذیویي سرچینو محدودېدل ګڼي او ټینګار کوي، چې دغه مسئله د دې لامل شوې چې په ځېنو سیمو کې د ځمکې لاندې اوبو کچه د ۱ او ۵ متره ترمنځ ټیټه شي.
