د ټاپ (TAP) پروژې د تخنیکي کمېټې درېیمه ناسته په انرژي معینیت کې ترسره شوه
د تېرو ناستو په تعقیب دغه ناسته هم د اوبو او انرژي وزارت د انرژي معین الحاج ملا عبدالهادي یعقوب تر مشري لاندې د دفتر عمومي رئیس قاري محمد عبدالعزیز عزیز، د دغه وزارت یو شمېر رئیسانو او د وزارتونو او نورو اړوندو ارګانونو د نوموړې کمېټې غړو په شتون کې ترسره شوه.
د اوبو او انرژي وزارت د دفتر عمومي رئیس د دغې ناستې په پیل کې د هېواد جغرافیایي او ترانزیټي ارزښت ته اشاره وکړه د دغې پروژې حیاتي ارزښت په پام کې نیولو سره یې د چارو په تنظیم او انسجام ټینګار وکړ.
د غونډې په دوام کې د ټاپ (TAP) پروژې د لارې د نقشې مسوده چې د ترکمنستان هېواد لخوا جوړه او رالېږل شوې وه د څېړنې او ارزونې لاندې ونیول شوه تر څو له ارزونې وروسته د رهبري کمېټې ته وړاندیز شي.
همدارنګه په دغې ناسته کې د ټاپ پروژې د رهبرې او تخنیکي کمېټې د دندو د لایحې د نهایي کولو په هکله هم بحث وشو تر څو اړین تصمیمونه ونیول شي.
