د ډبرو سکرو له سرچینو څخه د 72 میګاواټه برېښنا د تولید د عملي چارو د پیل په موخه د عوفي بهرام شرکت له مسئولینو سره د همغږي ناسته ترسره شوه
د اوبو او انرژي وزارت سرپرست وزیر ښاغلي ملا عبداللطیف منصور د عوفي بهرام د کانونو د استخراج او پروسس سوداګریز شرکت له مسئولینو سره په پکتیکا ولایت کې د 72 میګاواټو په وړتیا د برېښنا د تولید فابریکې جوړولو د عملي چارو د پیل په هکله بحث او د اندونو تبادله وکړه.
په یاده لیدنه کې نوموړي شرکت د یادې پروژې د عملي چارو د پیل لپاره خپل چمتووالی څرګند کړ او د عملي چارو د پیل لپاره د زمینې چمتو کولو په موخه دواړو لورو د لومړنيو چارو پر چټکتیا باندې ټینګار وکړ.
همدارنګه، په دې لیدنه کې د یاد شرکت مسئولینو په افغانستان کې د اسلامي بانکدارۍ په برخه کې هم د فعالیتونو ترسره کولو لیوالتیا څرګنده کړه او د اوبو او انرژي وزارت سرپرست وزیر ددوی له لیوالتیا څخه ستاینه وکړه او ډاډ یې ورکړ چې د اوبو او انرژي وزارت اړونده برخو کې به له دوی سره همکاري وکړې.
د یادونې وړ ده، چې څه موده مخکې د اوبو او انرژي وزارت او د یاد شرکت ترمنځ د ډبرو سکرو له سرچینو څخه د 72 میګاواټه برېښنا د تولید پروژې د پلي کولو په موخه د همکاري هوکړه لیک لاسلیک شوی وو.
