د یوه ایراني شرکت مسؤلینو د اوبو او انرژي له سرپرست وزیر سره په لیدنه کې د انرژي په پروژو کې پانګونې ته لېوالتیا څرګنده کړه

د اوبو او انرژي سرپرست وزیر محترم الحاج ملا عبداللطیف منصور د نیروی برق دیبا شرکت له مسؤلینو سره وکتل او له بېلابېلو سرچینو څخه د انرژي د تولید په برخه کې د پانګونې په هکله بحث او د اندونو تبادله وکړه.

په دغه لیدنه کې، د نوموړي شرکت مسؤلینو وویل، لېواله دي چې د اوبو، ډبرو سکرو، ګاز او لمر له سرچینو څخه د انرژي د تولید پروژو په برخه کې پانګونه وکړي.

د اوبو او انرژي سرپرست وزیر د دغه وزارت له لوري د اړینو همکاریو ډاډ ورکړ ، او له هغوی څخه یې و غوښتل چې د وزارت له تخنیکي ټیم سره د پروژو د ټاکلو او د پانګونې د څرنګوالي په هکله همغږي وکړي.

ښاغلي منصور زیاته کړه، چې د دواړو لورو د تخنیکي مسؤلینو ترمنځ تر همغږیو وروسته، د هوکړه لیک د لاسلیکولو او د عملي ګامونو د پلي کولو په برخه کې به وروستي اړین اقدامات ترسره شي.