غور ولایت کې د یوه چکډم جوړولو چارې د څه باندې ۹ میلیونه افغانیو په لګښت پیل شوې
د غور ولایت د دولینې ولسوالي په زیرتنګي تربولاق کلي کې د یوه چکډم جوړولو چارې د ۹ میلیونه، ۱۰۵ زره او ۴۷۳ افغانیو په لګښت د غور ولایت د اوبو او انرژي رئيس محترم ملا رحمت الله اماني، یو شمېر سیمه ایزو مسؤلینو او قومي مشرانو په شتون کې پيل شوې.
ښاغلي اماني د دغې پروژې په پرانیست غونډه کې د اوبیزو پروژو د ارزښت په هکله خبرې وکړې او اوبه یې ملي پانګه او الهي امانت وباله او پر اغېزمنې ګټې اخیستنې باندې ټینګار وکړ.
دغه پروژه د سیلابونو د کنټرول او د خطرونو د کمولو، د موسمي اوبو د را ټولولو او د ځمکې لاندې اوبو د پياوړتیا په موخه پلي کېږي، چې د چارو په بشپړېدو سره به ۶ زره او ۴۷۱ متره مکعب اوبه زېرمه شي.
نوموړې پروژه د اوبو او انرژي وزارت له بودجې څخه د غور ولایت د اوبو او انرژي ریاست تر څارنې لاندې پلي کېږي، چې ۵۰۰ کورنۍ به ورڅخه په مستقیمه توګه ګټه پورته کړي.
