لغمان ولایت کې د عزیزخان کڅ ساتندوی بولډروال جوړونې پروژه د څه باندې ۷۴ زره آمریکایي ډالرو په لګښت پیل شوه
د لغمان ولایت د قرغیو ولسوالي اړوند د عزیزخان کڅ ساتندوي بولډروال جوړونې پروژه د ۷۴ زره او ۶۲۴ اعشاریه ۴۰ آمریکایي ډالرو په لګښت د مهترلام- لغمان فرعي سیندیزې حوزې رئيس محترم مولوي شیرجان راشدي، د ایف، اې، او موسسې مسؤلینو او یو شمېر قومي مشرانو په شتون کې پيل شوه.
ښاغلي راشدي د دغې پروژې په پرانیست غونډه کې د هغې په هکله اړین معلومات وړاندې کړل او زیاته یې کړه، چې دغه پروژه ۵۰۰ متره اوږدوالی لري، او پکې ګڼ شمېر کسانو ته د کار زمینه چمتو شوې، او چارې به یې د شپږو میاشتو په موده کې بشپړې او ګټې اخیستنې ته وسپارل شي.
د نوموړې پروژې چارې د ایف، اې، او موسسې په مالي لګښت د مهترلام- لغمان فرعي سیندیزې حوزې تر څارنې لاندې پرمخ وړل کېږي، چې د چارو په بشپړېدو سره به یې پراخې کرنیزې ځمکې او استوګنیز کورونه تر یوه بریده د سیلابونو له ګواښونو څخه خوندي شي.
