ننګرهار ولایت کې د برکاشتوت د سربند تحکیماتو او کانال پروژه د کابو یو نیم میلیون آمریکایي ډالرو په ارزښت ګټې اخیستنې ته وسپارل شوه
د ننګرهار ولایت په خیوي ولسوالي کې د برکاشتوت د سربند تحکیماتو او کانال پروژه د اوبو او انرژي وزارت د اوبو معین ښاغلي انجنیر مجیب الرحمن عمر آخندزاده، د کابل سیندیزې حوزې عمومي رئيس ښاغلي انجنیر حبیب الرحمن حقپال، د ننګرهار سیندیزې حوزې رئيس ښاغلي سید فضل احد هاشمي او د یاد ولایت د یو شمېر نورو سیمه اییزو چارواکو په شتون کې د کابو یو نیم میلیون آمریکایي ډالرو په ارزښت ګټې اخیستنې ته و سپارل شوه.
د یادې پروژې څخه ۱۲۰۰ کورنۍ په مستقیم او غیر مستقیم ډول څخه ګټه اخلي او د ۱۲۰۰ جریبه ځمکې د خړوبولو وړتیا لري چې د جاپان PMS موسسې له خوا د ننګرهار سیندیزې حوزې تر څارنې لاندې پلې شوي ده.
همدارنګه د اوبو او انرژي وزارت د اوبو معین ښاغلي انجنیر مجیب الرحمن عمر آخندزاده ننګرهار ولایت ته د خپل سفر په ترڅ کې د یاد ولایت د مرستیال والي ښاغلي مولوي محمد رباني سره وکتل او د اوبو پروژو د غوره مدیریت په هکله یې ورسره بحث او د نظر تبادله وکړه.
