هلمند ولایت کې د ګلهبید خاورین بند جوړونې چارې د نږدې ۲۰ میلیونه افغانیو په لګښت بشپړې شوې
د هلمند ولایت په واشیر ولسوالي کې د ګلهبید خاورین بند جوړونې پروژه د ۱۹ میلیونه، ۶۷۹ زره او ۲۶۷ افغانیو په لګښت بشپړه او د هلمند د اوبو او انرژي رئیس محترم حاجي محمد یعقوب قائم او یو شمېر نورو سیمه ایزو مسؤلینو په شتون کې ګټې اخیستنې ته وسپارل شوه.
دغه خاورین بند د ۲۳۰ متره په اوږدوالي او ۱۲ متره لوړوالي سره د سیلابي اوبو د مهارولو او د هغه د ویجاړیو د مخنیوي او د ځمکې لاندې اوبو د تغذیې په موخه جوړ شوی، چې د کابو یو میلیون متر مکعب اوبو د زېرمه کولو وړتیا لري.
د نوموړې پروژې چارې د ملګرو ملتونو د نړیوال پرمختیایي پروګرام په مالي لګښت د هلمند د اوبو او انرژي ریاست تر څارنې لاندې پرمخ وړل کېدې.
