پنجشیر ولایت کې د غلبک سیند څنډو د ټینګښت پروژه د نږدې یو نیم میلیون افغانیو په لګښت پیل شوه
د پنجشیر ولایت په عنابه ولسوالي کې د غلبک(آبدره) سیند څنډو د ټینګښت پروژه د ۱ میلیون، ۴۱۸ زره او ۳۵۹ افغانیو په لګښت د پنجشیر د اوبو او انرژي رئيس محترم مولوي فضل الله عادل، قومي مشرانو او د قراردادي شرکت د مسؤلینو په شتون کې پیل شوه.
د پنجشیر د اوبو او انرژي رئيس د دغې پروژې په پرانیست غونډه کې د اوبو او انرژي وزارت له رهبري څخه په دغه ولایت کې د پراختیایي پروژو د پلي کولو له کبله مننه وکړه او خلکو ته یې د رښتیني خدمت ژمنه وکړه.
د دغې پروژې چارې د اوبو او انرژي وزارت له پراختیایي بودجې څخه د پنجشیر د اوبو او انرژي ریاست تر څارنې لاندې پرمخ وړل کېږي، چې د چارو په بشپړېدو سره به یې په غلبک کلي کې لسګونه جریبه کرنیزې ځمکې، میوه لرونکې ونې او د اوبو لګولو یو کانال د موسمي سیلابونو له ګواښونو څخه خوندي شي.
