په پکتیکا ولایت کې د اوبو د ککړتیا د مخنیوي په موخه د همغږۍ ناسته ترسره شوه
دغه ناسته د پکتیکا مرستیال والي محترم مولوي مخدوم عبدالسلام سعادات تر مشرې لاندې د ګوملې سیندیزې فرعي حوزې رئیس محترم مولوي فتح محمد ذاکر او د دغه ولایت د چاپېریال ساتنې، ښاروالي، کلیو پراختیا، کرنې، عامې روغتیا او علماو شورا رئيسانو په ګډون ترسره شوه.
په دغه ناسته کې، د ګوملې سیندیزې فرعي حوزې رئیس په پکتیکا ولایت کې د ځمکې لاندې اوبو د بې ځایه ګټې اخیستنې د مخنیوي او د ځمکې لاندې اوبو د پیاوړتیا لپاره د تقویتي څاګانو د کېندلو په اړه بشپړ معلومات وړاندې کړل.
همدارنګه، په دې ناسته کې د اوبو د ککړتیا د مخنیوي د کړنلارې په هکله پرزنټیشن وړاندې شو او د ځمکې لاندې اوبو د پياوړتیا ، تقویتي څاګانو د کېندلو ، د باران اوبو د را ټولولو د طرحې او د کارول شوو اوبو د بېرته ګټې اخیستنې د لارو چارو په هکله هم معلومات وړاندې شول.
