کندهار ولایت کې د یوه چکډم جوړولو پروژې چارې د څه باندې دوه میلیونه افغانیو په لګښت پیل شوې
د کندهار ولایت د تخته پل ولسوالي د برغني په کلي کې د یوه چکډم جوړولو پروژې چارې د ۲ میلیونه، ۱۵۴ زره او ۱۰۱ افغانیو په لګښت د کندهار ولایت د اوبو او انرژي رئيس محترم ملا سید محمد شرافت، علماوو او قومي مشرانو په شتون کې پیل شوې.
ښاغلي شرافت د نوموړي چکډم د چارو په پرانیست غونډه کې د هغه په هکله اړین معلومات له ګډونوالو سره شریک کړل او د اوبو د غوره مدیریت په هکله یې خبرې وکړې.
دغه چکډم د ۱۰۷ متره په اوږدوالي او ٤.٥ متره لوړوالي سره د افغانستان اسلامي امارت په مالي لګښت د کندهار ولایت د اوبو او انرژي ریاست تر څارنې لاندې جوړیږي، چې د چارو په بشپړېدو سره به یې ۷۰۰۰ متره مکعب اوبه زېرمه شي.
په دغه پروژه کې یو شمېر خلکو ته د کار زمینه چمتو شوې او چارې به یې د درې میاشتو په موده کې بشپړې او ګټې اخیستنې ته وسپارل شي.
