د اوبو او انرژي سرپرست وزير د ترکيې هېواد له يو شمېر علماو او سوداګرو سره د اوبو او انرژي په پروژو کې د پانګونې په هکله خبرې وکړې
د اوبو او انرژي سرپرست وزير محترم الحاج ملا عبداللطيف منصور د ترکيې هېواد له يو شمېر علماو او سوداګرو سره وکتل،چې په دغه ليدنه کې د ترکيې هېواد علماو او سوداګرو خپله همکاري د افغانستان له اسلامي امارت سره په ځانګړې توګه د اوبو او انرژي په پروژو کې د پانګونې په برخه کې څرګنده کړه
د اوبو او انرژي سرپرست وزير په دغه ليدنه کې ټينګار وکړ، چې په دغه هېواد کې د اقليمي بدلونونو او پرله پسې وچکاليو په پام کې نيولو سره، د اوبو مديريت او د انرژي پراختيا د افغانستان د خلکو ترټولو اړينو اړتياوو څخه ده
ښاغلي منصور په کابل ښار کې د ځمکې لاندې اوبو د کمېدو وضعيت ته په اشارې سره په لنډه توګه د دغه وزارت برنامو ته اشاره وکړه، او ترکي سوداګرو ته يې بلنه ورکړه،چې د کابل ښار د اوبو د برابرولو په پروژو کې لکه له پنجشير څخه کابل ته د اوبو د لېږد په پروژه، د شاتوت للندر د بند په پروژه او د اوبو او انرژي په نورو ټولګټو پروژو کې پانګونه وکړي
په ورته مهال، ترکي علماو او سوداګرو هم د اوبو او انرژي سرپرست وزير ته د افغانستان له اسلامي امارت سره د خپلو همکاريو په هکله ډاډ ورکړ او ژمنه يې وکړه، چې په افغانستان کې د اوبو او انرژي په پروژو کې د پانګونې او همدارنګه له دغه وزارت سره به د افغاني انجنيرانو د تخنيکي زده کړو په برخه کې همکاري وکړي.
