د اوبو او انرژي وزارت د انرژي معینیت نوی معین د دې وزارت کارمندانو ته ور وپېژندل شو
محترم ملا عبدالقاهر ادریس د اوبو او انرژي وزارت د انرژي معین په توګه د اوبو او انرژي وزارت د سرپرست وزیر محترم ملا عبداللطیف منصور او د افغانستان اسلامي امارت د چارو ادارې د مرستیال محترم مولوي سیف الدین تائیب له خوا د وزارت کارمندانو ته ور وپېژندل شو.
یاده برنامه چې د وزارت د جومات د امام محترم مولوي سید هارون له خوا د قرآن کریم د آیاتونو په تلاوت سره پيل شوه او د اوبو او انرژي وزارت د اطلاعاتو او نشراتو رئيس محترم الحاج غلام جیلاني حق پرست په آنانسري سره پرمخ وړل کېده، د کرنې، اوبولګولو او مالداري سرپرست وزیر محترم مولوي عطاالله عمري، د اوبو او انرژي وزارت د اوبو معین محترم مجیب الرحمن عمر آخندزاده او د افغانستان اسلامي امارت ګڼ شمېر نورو مسؤلینو هم ګډون درلود.
د اوبو او انرژي وزارت سرپرست وزیر محترم ملا عبداللطیف منصور د دې وزارت د نوي معین د پېژندلو د برنامې په بهیر کې په هېواد کې د انرژي سکتور اهمیت ته اشاره وکړه او همدارنګه د افغانستان په اسلامي امارت کې یې د محترم ملا عبدالقاهرادریس د پام وړ او ارښتناکو کړنو او په ځانګړې توګه د افغانستان بانک په ریاست کې د هغه د سرپرستي دوره په نیکۍ سره یاده کړه.
د ناستې په دوام کې د افغانستان اسلامي امارت د چارو ادارې مرستیال محترم مولوي سیف الدین تائیب د انرژي د نوي معین د حکم د لوستلو ترڅنګ، هغه ته یې ملت او خلکو ته د خدمت رسولو په لاره کې د بریا غوښتنه وکړه.
په ورته مهال، په دې برنامه کې د اوبو او انرژي وزارت د انرژي نوی ټاکل شوی معین محترم ملا عبدالقاهر ادریس په افغانستان بانک کې خپلو کړنو او لاسته راوړنو ته اشاره وکړه او د هېواد د انرژي په برخه کې د ځان بسیاینې په لار کې یې هڅو ته ژمنه وکړه.
له بلې خوا، محترم مولوي عطاالله عمري د کرنې، اوبولګولو او مالداري سرپرست وزیر، د برنامې په پای کې محترم ادریس او د اسلامي امارت ټولو مسؤلینو ته یې خلکو ته د خدمت رسولو په لار کې دعا وکړه او د بریا غوښتنه یې وکړه.
د یادونې وړ ده، چې د اوبو او انرژي وزارت د انرژي نوی معین محترم ملا عبدالقاهر ادریس د افغانستان اسلامي امارت د بیا واکمنېدو څخه تر اوسه پورې د افغانستان بانک د عمومي رئيس او همدارنګه د آمریکایانو د اشغال په دوره کې د افغانستان اسلامي امارت د مالي چارو عمومي مسؤل په توګه دنده ترسره کړې او خپلې چارې يې په بریالیتوب سره ترسره کړې دي.
