د اوبو او انرژي وزارت د رهبري مقام او د بغلان ولایت مقام ترمنځ د ۵۰۰ کیلو ولټ لېږد مزي پروژې د ننګونو د هوارولو او د چارو د چټکتیا په موخه د همغږي ناسته ترسره شوه
د اوبو او انرژي سرپرست وزیر محترم الحاج ملا عبداللطیف منصور د خپل کار په دفتر کې په داسې حال کې چې د انرژي معین محترم الحاج ملا عبدالهادي یعقوب او د انرژي سکتور یو شمېر رئيسانو هم ګډون درلود، د بغلان له والي محترم مولوي عبدالرحمن حقاني سره وکتل.
په دغه ناسته کې، په بغلان ولایت کې د اوبو او انرژي پروژو په ځانګړې توګه له خواجه الوان دښتې د کابل تر ارغندۍ پورې د ۵۰۰ کیلو ولټ لېږد مزي پروژې چارو د چټکتیا او ننګونو د هوارولو په هکله بحث او د اندونو تبادله ترسره شوه.
د اوبو او انرژي سرپرست وزیر د نوموړې پروژې پر حیاتي ارزښت ټینګار وکړ او په خپلو خبرو کې د پروژې د ستونزو د هوارولو د حل لارو چارو او د چارو چټکتیا ته اشاره وکړه. هغه، همدارنګه د بغلان والي ته ډاډ ورکړ، چې د دغه وزارت په پلان کې د اوبو او انرژي ډیرې پروژې په بغلان ولایت کې شاملې دي، چې په راتلونکي کې به د اړینو امکاناتو په چمتو کېدو سره د هغوی د پلي کولو په ځانګړې توګه د کیله ګي بند د پلي کولو لپاره اړین اقدامات تر لاس لاندې ونیول شي.
په ورته مهال، د بغلان والي د ۵۰۰ کیلو ولټ لېږد مزي پروژې د ننګونو د هوارولو په برخه کې د وزارت رهبري مقام ته د اړینو همکاریو ډاډ ورکړ.
