د 77 ترکي شرکت رئیس له بادي سرچینو څخه د 200 میګاواټه برېښنا د تولید په پروژه کې د پانګونې لیوالیتا څرګنده کړه
د اوبو او انرژي وزارت سرپرست وزیر ښاغلي ملا عبداللطیف منصور، د خپل کار په دفتر کې د 77 ترکي ساختماني شرکت له رئیس، ښاغلي سلیمان جیلیو سره وکتل او د بېلابېلو سرچینو څخه د انرژي د تولید په پروژو کې د پانګونې په برخه کې د ګډو همکاریو د پراختیا په هکله بحث او د اندونو تبادله وکړه.
په یاده لیدنه کې، د اوبو او انرژي وزارت سرپرست وزیر، په افغانستان کې د 77 ترکي شرکت له کړنو څخه ستاینه وکړه او د یاد شرکت له لوري د کجکي بند د دوهم فاز پروژې تطبیق یې د افغانستان د خلکو لپاره یوه ارزښتناکه لاسته راوړنه وبلله.
ښاغلي منصور د انرژي په پروژو کې د پانګونې پر پراختیا باندې ټینګار وکړ او د 77 ترکي شرکت رئیس ته یې ډاډ ورکړ چې د اوبو او انرژي وزارت رهبري له یاد شرکت سره د پانګونې د زمینې د چمتو کولو په برخه کې هر راز همکاري ته ژمن دی.
په ورته مهال، د 77 ترکي شرکت رئیس، ښاغلي سلیمان جیلیو ژمنه وکړه چې د تیرو همکاریو سربیره، په افغانستان کې له بادي سرچینو څخه د 200 میګاواټه برېښنا د تولید په پروژه کې هم پانګونې ته لیواله دی.
په پای کې، دواړو لورو هوکړه وکړه ترڅو د اوبو او انرژي وزارت او 77 ترکي شرکت تر منځ، له بادي سرچینو څخه د 200 میګاواټه برېښنا د تولید په پروژه کې د پانګونې په موخه د همکاري هوکړه لیک ژر تر ژره لاسلیک شې، ترڅو د یاد هوکړه لیک پر بنسټ د نوموړي پروژې عملي چارې پیل شې.
