لغمان ولایت کې د شاهي کانال رغنیزې چارې ۱۵ سلنه پرمخ تللې دي
د لغمان ولایت د اوبو او انرژي ریاست مسؤولینو د دغهٔ ولایت په الینګار ولسوالي کې د شاهي کانال د رغنیزو چارو له بهیر څخه څارنه وکړه او د شرکت مسؤولینو ته یې د چارو د چټکتیا او غوره والي په موخه اړینې لارښوونې وکړې.
د شاهي کانال په مسیر کې د کندن کاري، قالب بندي، کانکرېټ اچونې او پرکاري چارې په چټکۍ سره دوام لري، چې اوس مهال ۱۵ سلنه پرمخ تللې دي.
نوموړی کانال په ټوله کې د دوو فازونو په درلودلو سره ۷۰ کېلو مټره اوږدوالی لري او کابو ۲۰ زره هکټاره کرنیزه ځمکه خړوبوي.
د دغه کانال لومړی فاز د ۳۰ کېلومټره په اوږدوالي سره په څلورو برخو(لاټونو) کې پلي کېږي او ۵ زره هکټاره کرنیزه ځمکه خړوبوي، چې د لومړي فاز لومړۍ برخه(لاټ) یې ۶.۶ کېلومټره اوږدوالی لري.
