په موټر مینځل ځایونو کې د کارول شوو اوبو تصفیې او بیا کارولو دوراني سیسټم د بیلګې په توګه پلی او و ارزول شو
د اوبو او انرژي وزارت د اوبو چارو د تنظیم عمومي رئیس محترم محمد نعمان نثار، د ځمکې لاندې اوبو سرچینو رئیس محترم انجینر عزیزالرحمن عزیز او یو شمېر نورو تخنیکي انجینرانو د یاد سیسټم د پلي کېدو لومړۍ بېلګه تر څېړنې او اورزونې لاندې ونیوله.
دا سیسټم د آزموینې په توګه په موټر مینځل ځایونو کې د اوبو بیا کارولو لپاره د ځمکې لاندې اوبو سرچینو د مدیریت او تنظیم په موخه د اوبو او انرژي وزارت د انجینرانو لخوا ډیزاین شوی ، ترڅو د موټر مینځلو په وخت کې د اوبو ضایع کېدو مخه ونیسي او د ځمکې لاندې اوبو څخه اغېزمنه ګټه اخیستنه خوندي کړي، چې د صفا شارجې موټر مینځل ځایونو د مالک لخوا د کابل ښار په پنځمه ناحیه کې پلی شوی.
څرنګه چې په اوسنيو شرايطو کې د دغه سيسټم تطبيق ګټورې پايلې لرلې او د ځمکې لاندې اوبو د بې ځایه کارولو د مخنيوي لپاره خورا اړین ګڼل کیږي، د اوبو او انرژي وزارت په پام کې لري چې د کابل او نورو لويو ښارونو په ټولو موټر مينځل ځایونو کې يې پلی کړي.
