کاپیسا ولایت کې د څلورو عمومي کانالونو د پاکاري چارې پیل شوې
کاپيسا ولایت کې د ریګروان، شاخ آب، افغان او ده بابي کانالونو د پاکاري چارې د کاپيسا ولایت د اوبو او انرژي ریاست تر څارنې لاندې د یوه عمومي حشر په ترڅ کې پیل شوې.
نوموړي کانالونه په ټوله کې د ۱۰۲ کیلو متره اوږدوالي په درلودلو سره د ۲۱ زره هکتاره کرنیزې ځمکې د خړوبولو وړتیا لري او ټاکل شوې ده، چې د پنځه ورځو په ترڅ کې پاکاري شي.
له بلې خوا، د کاپیسا ولایت د اوبو او انرژي ریاست مسؤلینو د قول بابر کلي د سربند او کانال پروژې د چارو له بهیر څخه څارنه وکړه او اړوندو مسؤلینو ته د نیمګرتیاوو د هوارولو او د چارو د غوره پرمخ وړلو په موخه اړینې لارښوونې وکړې.
