کندز ولایت کې دخوراک په مقابل کې د کار ملي پروګرام په اړوند ناسته ترسره شوه
د افغانستان اسلامي امارت د رئيس الوزرا د هدایت په اساس دا ناسته د کندز ولایت د والي تر ریاست لاندې د یاد ولایت د مرستیال، ولسوالانو، د کانالونو میرابانو او د خوراک په مقابل کې د کار ملي پروګرام د رهبري پلاوي د کمېټې غړو په ګډون کې د ولایت د مقام په تالار کې جوړه شوه.
په دغه ناسته کې د اوبو د اهمیت او د کثافاتو او رسوباتو څخه د کانالونو پاکونې په اړه خبرې وشوې او ټولو میرابانو ته هدایت ورکړل شو، چې په دغه پروګرام کې د پنج آمو سیندیزې عمومي حوزې ریاست او د ولسوالیو د ساحوي مدیرانو سره په همغږۍ سره فعاله ونډه واخلي، ترڅو دغه پروګرام په سمه او درسته توګه د نیمګړتیا پرته په ساحه کې پلی شي او بزګران د کانالونو د پاکونې او خپلو کښتونو ته د اوبو رسولو له ستونزې څخه خلاص شي.
