د اوبو او انرژي وزارت د دعوت او ارشاد ریاست اصلاحي او روزنیز پروګرام په عباداتو کې د اخلاص او له ریا څخه د لرې والي په هکله ترسره شو
د اوبو او انرژي وزارت د دعوت او ارشاد ریاست اصلاحي او روزنیز پروګرام د دې وزارت د انرژي معینیت د ګڼ شمېر کارمندانو په شتون کې ترسره شو.
په دې اصلاحي او روزنیزپروګرام کې د وزارت د دعوت او ارشاد رئيس ښاغلي مولوي ګل الرحمن عارف په عباداتو کې د اخلاص او له ریا څخه د لرې والي په هکله د انرژي معینیت کارمندانو ته هر اړخیز معلومات وړاندې کړل.
د دعوت او ارشاد رئيس ښاغلي مولوي عارف په یاده روزنیزه ناسته کې، ټول کارمندان وهڅول چې د عباداتو په ترسره کولو کې مو باید موخه یوازي د الله(ج) د رضا تر لاسه کول وي.هغه زیاته کړه کله چې مو د رښتیني عباداتو په ترسره کولو کې د خدای(ج) رضا تر لاسه کړه، الله(ج) به زمونږ ټولې دنیوي ستونزې هوارې او په آخرت کې به مو هم سر لوړي کړي.
د دعوت او ارشاد رئيس په یاده ناسته کې له ټولو کارمندانو څخه و غوښتل، چې ور سپارل شوې دندې په رښتینولۍ سره ترسره او د خپلو آمرینو له اوامرو څخه اطاعت وکړي، ځکه چې په اسلام کې له آمرینو څخه اطاعت او پیروي واجب ده.
یاده ناسته په دعائيې سره پای ته ورسېده.
