د اوبو او انرژي وزارت سرپرست وزیر د شاه و عروس بند د پروژې وضعیت له نږدې څخه وڅېړه
د اوبو او انرژي وزارت سرپرست وزیر ښاغلي ملا عبداللطیف منصور او ورسره مل د وزارت یو شمېر تخنیکي مسؤلینو د کابل ولایت شکر درې په ولسوالي کې د شاه و عروس بند د پروژې وضعیت له نږدې څخه ترڅېړنې او مطالعي لاندې ونیو.
د شاه و عروس بند څخه یاده لیدنه په دې موخه ترسره شوه چې څو ورځې کیږي چې یوه ویډیو په ټولنیزو رسنیو کې لاس په لاس کېږي چې ګني د یاد بند کانکریټ ویجاړ شوی او دا سې ښیې چې ګني د بند کانکریټ زیانمنیدونکی دی.
په همدې موخه د اوبو او انرژي وزارت سرپرست وزیر په خپله د بند ساحه له نږدې څخه وکتله او د پروژې له تخنیکي مسؤلینو څخه يې په دې اړه وضاحت و غوښت چې د بند په ساحه کې لږ کانکریټي پوستکي لټېدلې دي. هغه په مفصله توګه د تخنیکي څېړنو او د مسؤلینو د آندونو څخه وروسته څرګنده کړه، چې دا موضوع د اندیښنې وړ نه ده او ډېر ژر به د مسؤلینو په واسطه بیا ورغول شي.
همداراز تخنیکي مسؤلینو هم یاده کړه او ډاډ یې ورکړ چې دا موضوع د اندیښنې وړ نه ده او یوازې د کانکریټي پوستکو د لټېدلو یوه سلسله ده چې د بیارغولو وړ ده.
همدارنګه ښاغلي منصور د پروژې د وضعیت او پاتې چارو په هکله د قراردادي شرکت له استازي سره خبرې وکړي او د بند د پاتې چارو د لا چټکتیا لپاره یې د پروژې تخنیکي مسؤلینو ته لازم هدایات ورکړل.
د یادونې وړ ده، چې د شاه وعروس بند پروژه د اوبو او انرژي وزارت د کار لاندې پروژو څخه یوه پروژه ده چې په شکر درې ولسوالي کې د اوبو لګولو، د څښاک اوبو د برابرولو او د برېښنا د تولید په موخه په لاره اچول شوې ده.
