د اوبو او انرژي وزارت سرپرست وزیر د لغمان ولایت له والي سره وکتل
د اوبو او انرژي وزارت سرپرست وزیر ښاغلي ملا عبداللطیف منصور دخپل کار په دفتر کې د لغمان ولایت له والي ښاغلي الحاج قاري زین العابدین عابد سره وکتل او په یاد ولایت کې یې د شاهي کانال پروژې د چارو د بیاځلې پيلولو په هکله بحث او د نظر تبادله وکړه.
په دي لېدنه کي د لغمان ولایت والي د یاد ولایت د خلکو د ستونزو او د اوبو د مدیریت په برخه کي د پراختیایي پروژو اړتیاوو ته په اشارې سره د شاهي کانال پروژې د چارو د بیاځلې پیلولو غوښتنه وکړه.
د اوبو او انرژي وزارت سرپرست وزیر په دې لیدنه کې د پراختیایې پروژو د بودجې کمښت ته په اشارې سره وویل چي: " د اوبو او انرژي وزارت د سترو پروژو د تطبیق لپاره د خصوصي پانګونې طرحې د اسلامي امارت له اقتصادي کمیسیون سره شریکې کړې دي، ترڅو د خصوصي پانګوني له لارې د یادو پروژو د تطبیق زمینه چمتو شي. "
ښاغلي منصور د لغمان والي ته ډاډ ورکړ او ټینګار یې وکړ چې مونږ هڅه کوو، ترڅو د شاهي کانال پروژې د پلي کیدو بودجه د خصوصي سکتور د پانګونې له لارې چمتو کړو.
د یادونې وړ ده، چې دلغمان ولایت د شاهي کانال پروژه د اوبو او انرژي وزارت د سترو پروژو څخه یوه پروژه ده ، چې د یادې پروژې په پلي کیدو سره به نږدې ۵ زره هکتاره ځمکه تر خړوبولو لاندې راشي.
