د اوبو او انرژي وزارت سرپرست وزیر د هېواد له یوه نړیوال شهرت لرونکي قاري سره وکتل
د اوبو او انرژي وزارت سرپرست وزیر ښاغلي ملا عبداللطیف منصور د هېواد له یوه نړیوال شهرت لرونکي قاري ښاغلي قاري عبدالکبیر حیدري سره وکتل او د قرآن کریم د ښوونې د ارزښت او د ټولنې د معنوي روزنې په هکله بحث او د نظر تبادله وکړه.
په یاده لیدنه کې، د اوبو او انرژي وزارت سرپرست وزیر د قرآني علومو د پراختیا په برخه کې د ښاغلي قاري عبدالکبیر حیدري له هلوځلو څخه قدرداني وکړه.
همدارنګه له دې لیدنې وروسته، د وزارت په جومات کې د قرآن کریم د قرآئت غونډه د اوبو او انرژي وزارت د ټولو کارمندانو په شتون کې ترسره شوه او د وزارت ټول مسؤلین او کارمندان د ښاغلي قاري عبدالکبیر حیدري له ښکلي قرآئت اوریدلو څخه برخمن شول.
د ناستې په پای کې نوموړی قاري صاحب د ښاغلي منصور صاحب له خوا په لنګۍ او یو ټوک قرآن کریم په ډالۍ ونازول شو.
