په نغلو کې د لس میګاواټه لمریزې برېښنا د تولید پروژه پرانیستل شوه
دغه پروژه د ریاست الوزرا د اقتصادي مرستیال محترم ملا عبدالغني برادر، د اوبو او انرژي سرپرست وزیر محترم الحاج ملا عبداللطیف منصور، د اسلامي امارت د لوړ پوړو مسؤلینو، د عوفي بهرام شرکت مسؤلینو او د اوبو او انرژي وزارت د رئیسانو او انجنیرانو په شتون کې پرانیستل شوه.
د افغانستان د اسلامي امارت د ریاست الوزرا اقتصادي مرستیال د دغې پروژې د پرانیستې پر مهال د دې پروژې پلي کول په هېواد کې د انرژي د پراختیا په لاره کې یو مثبت ګام وباله او یادونه یې وکړه، چې اسلامي امارت هوډ لري چې په راتلونکي کې د انرژي په برخه کې نورې پروژې هم پلي کړي.
په ورته مهال، د اوبو او انرژي سرپرست وزیر محترم ملا عبداللطیف منصور د دغې پروژې اغېزمنتیا ته په لنډ ډول نغوته وکړه او زیاته یې کړه چې د انرژي پراختیا د اهمیت له پلوه د افغانستان د اسلامي امارت په لومړیتوبونو کې ځای لري او اوسمهال له هره پلوه په دې برخه کې د پانګونې لپاره زمینه چمتو ده.
همدغه راز، د عوفي بهرام شرکت مسؤل په دغه برنامه کې یادونه وکړه، چې مونږ د انرژي د تولید په پروژو کې همکاري او د پانګونې پراختیا ته ژمن یو او نورو ټولو پانګوالو ته بلنه ورکوو چې په افغانستان کې پانګونه وکړي.
همدارنګه د وزارت د مقام سلاکار محترم ډاکټر فاروق اعظم د انرژي د ارزښت او اړتیا په هکله خبرې وکړې او برېښنا انرژي یې د هېواد له اړینو اړتیاوو څخه وباله.
د یادونې وړ ده، چې دغه د لمریزې برېښنا انرژي د تولید ۱۰ میګاواټه پروژه د اوبو او انرژي وزارت له خوا د عوفي بهرام د کانونو د پروسس او را ایستلو شرکت په پانګونې سره د کابل ولایت د نغلو په سیمه کې د ۱۰ میاشتو په موده کې پلي کېږي، چې له پلي کېدو وروسته یې برېښنا عمومي شبکې ته نښلول کېږي او د کابل او جلال آباد اوسیدونکي به ورڅخه برخمن شي.
