د کابل سیندیزې عمومي حوزې او د کابل پولي تخنیک پوهنتون د مسؤلینو ترمنځ د دوه اړخیزو همکاریو په موخه د همغږۍ ناسته ترسره شوه
دغه ناسته د کابل سیندیزې عمومي حوزې رئيس محترم انجنیر حبیب الرحمن حقپال،د کابل سیندیزې عمومي حوزې تخنیکي سلاکار محترم انجنیر روح الله مایار، د کابل پولي تخنیک پوهنتون عمومي رئیس محترم پوهنوال دیپلوم انجنیر عبدالرشید اقبال، د اوبو سرچینو او چاپېریال ساتنې پوهنځيو رئيسانو او یو شمېر استادانو په ګډون ترسره شوه.
په دغه ناسته کې، د اوبو او انرژي وزارت او لوړو زده کړو وزارت ترمنځ د لاسلیک شوې تفاهم نامې د غوره پلي کولو ، د دواړو ادارو ترمنځ د اوبو د مدیریت او تنظیم په برخه کې د ښې همغږۍ ، د پولي تخنیک پوهنتون په سیمه کې د باران اوبو د راټولولو او د ځمکې لاندې اوبو د پیاوړتیا په موخه د جذبې څاګانو د کېندلو په هکله بحث او د اندونو تبادله وشوه.
د کابل سیندیزې حوزې عمومې رئیس په دغه ناسته کې د یادې حوزې اړوند په ځانګړې توګه د کابل په ښار او شاوخوا سیمو کې په تېرو دوو کلونو کې د ترسره شوو چارو او لاسته راوړنو په هکله اړین معلومات وړاندې کړل او د کابل پولي تخنیک پوهنتون په سیمه کې د اوبو د مدیریت اهمیت ته په کتو د هر ډول همکارۍ ژمنه وکړه.
