د اوبو او انرژي وزارت او د ترکمنستان هېواد د پلاوي ګډه ناسته د دواړو هېوادونو ترمنځ د دوو اړخیزو همکاريو د ترسره کولو په هکله ترسره شوه
د اوبو او انرژي سرپرست وزیر محترم الحاج ملا عبداللطیف منصور په یوې ناستې کې د ترکمنستان هېواد د انرژي د نړیوالو پروژو له رئيس محترم مراد ارتیکوف سره د ټاپ سیمه ییزې پروژې، د برېښنا انتقالي مزو د پروژې، د نورالجهاد سب سټیشن د پروژې او د دواړو هېوادونو ترمنځ د دوو اړخیزو همکاریو د پراختیا په هکله بحث او د اندونو تبادله وکړه.
د اوبو او انرژي سرپرست وزیر په دغه ناسته کې د ترکمنستان هېواد پلاوي ته د ښه راغلاست ویلو ترڅنګ، په افغانستان کې د برېښنا د برابرولو او د برېښنا رسونې پروژو په برخه کې د هغه هېواد له تلپاتو همکاریو ستاینه وکړه او د دغو همکاریو په پراختیا او دوام باندې یې ټینګار وکړ.
ښاغلي منصور د ټاپ نړیوالي پروژې د پلي کولو په هکله وویل چې افغانستان په دې برخه کې بشپړ چمتووالی لري او تمه لري چې له نورو اړخونو سره هم د دغې پروژې د پلي کولو په برخه کې اړینه همغږي ترسره شي، ترڅو د پلي کولو زمینه یې چمتو شي. هغه همدارنګه د ترکمنستان- شبرغان- خواجه الوان دښتې تر اغندۍ پورې د ۵۰۰ کیلو ولټ انتقالي مزي د پروژې د پلي کولو په تړاو هم یادونه وکړه، چې د دغې پروژې د پلي کولو لپاره ګڼ شمېر پانګوالو چمتووالی څرګند کړی او تمه ده چې د ترکمنستان هېواد له لوري هم اړینه همکاري ترسره شي.
په ورته مهال، د ترکمنستان هېواد د انرژي د نړیوالو پروژو رئیس هم د ټاپ نړیوالي پروژې او په افغانستان کې د نورو برېښنا رسونې پروژو د پلي کولو په برخه کې خپل چمتووالی څرګند کړ او کابل ته یې د خپل سفر موخه د دواړو هېوادونو ترمنځ د برېښنا تړون د غځولو او د دواړو لورو ترمنځ د دوو اړخیزو همکاریو پراختیا وبلله.
ښاغلي مراد وویل چې په هرات ولایت کې د نورالجهاد سب سټیشن چارې مخ پر بشپړېدو دي او همدارنګه ترکمنستان هېواد د هرات او فراه ولایتونو د برېښنا د برابرولو لپار هم چمتووالی لري
د دغې ناستې په پای کې دواړو لورو د دوو اړخیزو همکاریو پر دوام او پراختیا باندې ټينګار وکړ.
