د انرژي معینیت اونیزه تخنیکي او اداري ناسته ترسره شوه
دغه ناسته د دفتر عمومي رئيس او د انرژي معینیت د غونډو وارسي کوونکي محترم قاري محمد عبدالعزیز عزیز تر مشري لاندې د رئيسانو او د دغه معینیت د یو شمېر نورو تخنیکي مسؤلینو په ګډون ترسره شوه.
په دغه ناسته کې تر ۵۰۰ کیلوواټو پورته وړتیا لرونکو د برېښنا د تولید پروژو د طرحې پلي کولو او د هغوی د ساتنې او مراقبت لپاره د کړنلارې چمتو کولو، د انرژي سکتور د ستونزو هوارولو لپاره د شونو حل لارو موندلو او د هېواد د انرژي سکتور د پراختیا لپاره د کړنو د چټکتیا او چارو د انسجام په هکله بحث او د اندونو تبادله وشوه.
د ناستې په ترڅ کې اړوندو رئیسانو او مسئولینو خپل اندونه وړاندې کړل او د هغوی د ګزارشونو او معلوماتو تر اورېدو وروسته، د چارو د ښه والي او چټکتیا په موخه اړینې پریکړې وشوې.
