په پروان ولایت کې د اوبیزو سرچینو د دریو پروژو سروې ترسره شوه
د غوربند- چاریکار سیندیزې فرعي حوزې مسؤلینو د پروان ولایت په سیدخېلو ولسوالي کې د اوبیزو سرچینو د دریو پروژو ټولنیزه، اقتصادي، کرنیزه، چاپېریالي او تخنیکي سروې چې پکې د استنادي دېوالونو او د پنجشیر او غوربند سیندونو د څنډو تحکیم کاري شامله ده، ترسره کړه.
د نوموړو پروژو په پلي کېدو سره به د سلګونو کسانو لپاره د کار زمینه چمتو او همدارنګه به سلګونه هکتاره کرنیزه ځمکه او استوګنیز کورونه د سیلابونو له ګواښ څخه خوندي شي.
په ورته مهال، دنوموړې حوزې مسؤلینو د کابل پوهنتون د ځمکې پېژندنې پوهنځي د پرکتیک پړاو زده کړیالانو ته په نظري او عملي توګه له سټیشنونو څخه د ارقامو د راټولولو، د اوبو د کچې د اندازه ګیري او ډیټا اخیستلو په برخه کې ښوونه ورکړه.
