د دوو شرکتونو مسؤلینو د لغمان ولایت د شاهي کانال د دوهمې برخې پروژې او د کله ګوش بند په پروژه کې د پانګونې لپاره لېوالتیا څرګنده کړه
د اوبو او انرژي سرپرست وزیر محترم الحاج ملا عبداللطیف منصور د خپل کار په دفتر کې د مسرور احمدخان او ظفر احمدزي ودانیزو شرکتونو له مسؤلینو سره وکتل.
په دغه لیدنه کې، د نوموړو شرکتونو مسؤلینو د ۷۰ کیلومترو په اوږدوالي سره د شاهي کانال د دوهمې برخې پروژې او د لغمان ولایت د کله ګوش بند د جوړولو په پروژه کې د پانګونې لپاره لېوالتیا څرګنده کړه.
د اوبو او انرژي سرپرست وزیر د هغوی د پانګونې د لېوالتيا هر کلی وکړ او د نوموړو پروژو ارزښت ته په اشارې سره یې ټینګار وکړ، چې ډېر ژر دې اړینه همغږۍ رامنځته او د دواړو لورو ترمنځ دې د همکاري هوکړه لیک لاسلیک شي، ترڅو د پروژې عملي چارې پیل شي.
