د اوبو او انرژي سرپرست وزیر د پکتیکا ولایت له مشرانو سره په هغه ولایت کې د اوبو او برېښنا د پروژو په هکله خبرې وکړې
د اوبو او انرژي سرپرست وزیر محترم الحاج ملا عبداللطیف منصور د پکتیکا ولایت له یو شمېر قومي مشرانو سره وکتل او په هغه ولایت کې یې د اوبو او انرژي د پراختیایي پروژو په هکله خبرې وکړې.
په دغه لیدنه کې، د نوموړي ولایت مشرانو د اوبو او انرژي وزارت د رهبري د کړنو د ستایلو تر څنګ په هغه ولایت کې د لا زیاتو پروژو د پلي کولو غوښتنه وکړه.
د اوبو او انرژي سرپرست وزیر هغوی ته ډاډ ورکړ، چې اوسمهال په هغه ولایت کې د پلتوني بند چارې په ښه توګه روانې دي، د دغه وزارت له لوري په هغه ولایت کې د 3.5 میګاواټه په وړتیا د لمریزې برېښنا پروژه له شبکې سره منظوره شوې، چې اوسمهال یې اسناد د منظوري د ترلاسه کولو په موخه اقتصادي کمېسیون ته لېږل شوي دي.
ښاغلي منصور زیاته کړه، چې دغه وزارت د پکتیکا ولایت لپاره لا ډېرې پروژې په خپل پلان کې نیولې دي، چې د اړینو امکاناتو په چمتو کېدو سره به یې په راتلونکي د پلي کېدو چارې پیل شي.
