اطلاعاتو او کلتور وزارت کې د انرژي د سپما او اغېزمنتیا په هکله د اوبو او انرژي وزارت له لوري د عامه پوهاوي برنامه وړاندې شوه
په دغه برنامه کې د انرژي د سپما د مناسبو لارو، چارو په هکله د اطلاعاتو او کلتور وزارت له کارمندانو سره اړین معلومات شریک شول.
همدارنګه د برنامې په دوام کې د اوبو او انرژي وزارت د پایدارې انرژي د عمومي ریاست تر چتر لاندې د انرژي د مثمریت او تحفظ ریاست کارمندانو هر یو انجنیر منصورالرحمن عبدالحی د انرژي مثمریت آمر، انجنیر عبدالحسیب صفدر د انرژي مثمریت د عامه پوهاوي کارپوه او انجنیر صدیق الله ځلاند د انرژي مثمریت اقتصادي کارشناس ، د پرزینټېشن په وړاندې کولو سره په بشپړه توګه د انرژي مدیریت، د انرژي سرچینو د ساتنې، چاپیریال ساتنې، د انرژي د سپما ارزښت او د سپما تګلارې اړوند معلومات ګډونوالو ته ورکړل او د یادې برنامې د وړاندې کولو موخه یې له انرژي څخه په سمه توګه ګټه اخیستنه او عامه پوهاوی وباله.
د یادونې وړ ده، چې د انرژي سپما د عامه پوهاوي برنامې د اقتصادي کمیسیون 20/9/1445 نېټې 13 ګڼې مصوبې دوهم بند د تحقق په موخه له پلان سره سم د اوبو او انرژي وزارت لخوا تر دې مخکې په څو وزارتونو کې ترسره شوې او په راتلونکي کې به هم دوام ومومي.
