چین هېواد کې د باغدرې برېښنا بند د ډبرو د مطالعاتو پروسه پرانیستل شوه
د اوبو او انرژي وزارت د انرژي د انجنیري چوپړتیاوو مشورتي ریاست (واپیکا) رئيس محترم انجنیر محمد اسماعیل عمار مموزي او ورسره مل تخنیکي ټیم چین هېواد ته د خپل سفر په ترڅ کې د دغه هېواد په کیومنګ ښار کې د پاورچینا شرکت له عمومي رئيس ښاغلي 姚东yao zong او د هغه شرکت د مطالعاتو او لابراتوارونو څانګې له مسؤلینو سره وکتل او د باغدرې برېښنا بند د چارو په هکله بحث او د اندونو تبادله وکړه.
د نوموړي شرکت مسؤلینو د ښاغلي عمار مموزي او ورسره مل تخنیکي ټیم په شتون کې د باغدرې برېښنا بند د ډبرو د مطالعاتو پروسه په رسمي توګه پرانیسته.
همدارنګه، ښاغلي عمار مموزي د نوموړي شرکت له عمومي رئيس څخه د باغدرې برېښنا بند د ډبرو د مطالعاتو په پروسه کې د کره پاملرنې غوښتنه وکړه.
په ورته مهال، د نوموړي شرکت عمومي رئيس د اوبو او انرژي وزارت پلاوي ته د نوموړي بند د ډبرو په مطالعاتو کې د کره پاملرنې د ډاډ ترڅنګ د هر راز همکاري ژمنه ورکړه.
د یادونې وړ ده، چې د باغدرې برېښنا بند د اوبو او انرژي وزارت یو له مهمو پروژه څخه ده، چې په جوړېدو سره به یې څه باندې ۲۴۰ مېګاواټه برېښنا تولید شي.
