خوست ولایت کې د یوه سربند، کانال او استنادي دېوال پروژې چارې د نږدې ۲۳۰ زره آمریکایي ډالرو په لګښت پيل شوې
د خوست ولایت د مرکز اړوند د شمل پیرانو په سیمه کې د یوه سربند، کانال او استنادي دېوال پروژې چارې د ۲۲۹ زره او ۷۸۳ آمریکایي ډالرو په لګښت د خوست والي محترم عبدالله مختار، د کابل عمومي حوزوي رئيس محترم احسان الله حقیار، د خوست د اوبو او انرژي رئيس محترم مولوي عبدالقیوم ثابت او یو شمېر نورو سیمه ایزو مسؤلینو، قومي مشرانو او د ایف، اې، او موسسې د مسؤلینو په شتون کې پیل شوې.
د دغې پروژې په پرانیست غونډه کې د خوست والي، د کابل عمومي حوزوي رئيس او د خوست د اوبو او انرژي رئيس د هغې د ارزښت په هکله خبرې وکړې.
په دغه پروژه کې د 2.25 متره په لوړوالي او 145 متره په اوږدوالي یو سربند، یو کانال چې کابو ۵۰۰ متره اوږدوالي لري او د 416 متره په اوږدوالي او 3.75 متره په لوړوالي یو استنادي دېوال شامل دی، چې چارې به یې د یوه کال په موده کې بشپړې او ګټې اخیستنې ته وسپارل شي.
د نوموړې پروژې چارې د ایف، اې، او موسسې په مالي لګښت د خوست د اوبو او انرژي ریاست تر څارنې لاندې پرمخ وړل کېږي، چې د چارو به بشپړېدو سره به یې شاو خوا ۲۱۲۰ جریبه ځمکه خړوبه شي.
