د هیواد د طبیعي سرچینو څخه د برښنا تولید په برخه کې نوې زیری
په شبرغان ښار کې د لومړي ځل لپاره د طبیعي ګاز څخه د ۴۲ میګاواټه برښنا د تولید په ظرفیت، نن ورځ پنجشنبه د لړم ۳۰ مه نیټه د مالیې وزارت سرپرست او په بنسټیزو چارو کې د ولسمشرۍ عالی مقام ستر سلاکار ښاغلی پروفیسور محمد همایون قیومی، د اوبو او انرژي وزارت سرپرست ښاغلی انجنیر محمد گل خُلمی او د کانونو او پټرولیم وزارت سرپرست ښاغلی عنایت الله مومند لخوا په رسمي ډول پرانيستل او د ګتی اخسیتلو لپاره وسپارل شو.
د شبرغان طبیعي ګاز څخه د برښنا تولیدي دستګاه د ۴۲ میګاواټه برښنا د تولید ظرفیت لري او د ۳۸.۷۸ میلیونو ډالرو په ارزښت د بیات پاور شرکت لخوا تمویل شوی چی د عامه خصوصي مشارکت له لارې د اوبو او انرژۍ وزارت لخوا پلان شوې وه او ټاکل شوی ده چی د دې پروژې تولید شوی برښنا د یو قرارداد په ترڅ کې د افغانستان برښنا شرکت عمومی ریاست ته به وپلورل شي.
د دې پروژې د بشپړولو سره شاوخوا ۴۲۰۰۰ کورنۍ د برښنا له رڼا څخه ګټه پورته کوي. او له ۳۸۰ څخه زیاتو تنو ته پدې دستګاه کې کار کوي.
د یادونې وړ ده چې د کانونو او پټرولیم وزارت او د افغانستان ګاز شرکت د برښنا تولید لپاره د ګازو چمتو کولو په برخه کې د اوبو او انرژۍ وزارت سره همکاري کړې ده.
