لوګر ولایت کې د شیندار خېلو چکډم چارې د نږدې څلور میلیونه افغانیو په ارزښت پیل شوې
د لوګر ولایت په خوښۍ ولسوالي کې د شیندارخېلو چکډم چارې د درې میلیونه، نهه سوه درې څلوېښت زره او یو سلو دوه پنځوس(۳۹۴۳۱۵۲) افغانیو په ارزښت د لوګر سیندیزې فرعي حوزې رئيس محترم ملا محمد اسماعیل آخندزاده، د دغه ریاست تخنیکي سلاکار محترم انجنیر فضل الرحمن عمرزي، د خوښۍ مرستیال ولسوال او د یو شمېر قومي مشرانو په ګډون پیل شوې.
دغه چکډم چې د ۵۳ متره په اوږدوالي او د ۴.۵ متره په لوړوالي جوړېږي د 6063.2 متره مکعب اوبو د ذخیره کولو وړتیا به ولري او د ځمکې لاندې اوبو د پیاوړتیا لامل شي.
د دغې پروژې چارې د افغانستان د اسلامي امارت په مالي لګښت پرمخ وړل کېږي او چارې به یې د درې میاشتو په موده کې بشپړې او ګټې اخیستنې ته به وسپارل شي.
