د اوبو او انرژي سرپرست وزیر د ارزګان له مرستیال والي سره په لیدنه کې وویل چې د آغاجان بند د پروژې چارې د دغه وزارت په لومړیتوبونو کې دي
د اوبو او انرژي سرپرست وزیر محترم الحاج ملا عبداللطیف منصور د خپل کار په دفتر کې د ارزګان له مرستیال والي محترم حاجي ملا باري ګل آخند سره وکتل او د آغاجان بند د پروژې په هکله یې بحث او د اندونو تبادله وکړه.
په دغه لیدنه کې، د اوبو او انرژي سرپرست وزیر د ارزګان مرستیال والي ته ډاډ ورکړ، چې د آغاجان بند پروژه د دغه وزارت په کاري لومړیتوبونو کې ځای لري او اوسمهال چې د مطالعاتو د امکان سنجي لپاره یې بودجه منظوره شوې او د محترم عالیقدر امیرالمؤمنین حفظه الله د مقام لارښوونه هم د نوموړې پروژې د پلي کولو لپاره شتون لري، له همدې کبله دغه وزارت هڅه کوي، چې چارې یې ډېر ژر پیل کړي.
