د افغانستان د اسلامي امارت د اوبو او انرژي سرپرست وزیر د  DBE HOLDING شرکت د آسیا د برخي له رئیس سره لیدنه وکړه.

د افغانستان د اسلامي امارت د اوبو او انرژي سرپرست وزیر الحاج ملا عبداللطیف منصور او د افغانستان برېښنا شرکت اجرائیوي رئیس ملا محمد حنیف حمزه تیره ورځ په تر کیه کې د  DBE HOLDING  شرکت د آسیایی برخي له رئیس ښاغلي Mehmat Taha PINAR سره لیدنه وکړه.

یاد شرکت چې د لمریزې برېښنا د تولید په برخه کې نړيوال شهرت لري او د ټولې اروپا په سطحه دریم مقام لري؛ د خپل شرکت په هکله له محترم وزیر صاحب او مل پلاوي سره اړین معلومات شریک کړل.

محترم وزیر صاحب دوي ته بلنه ورکړه چې افغانستان ته راشي تر څو له یوې خوا په افغانستان کې د لمریزې برېښنا د تولید په برخه کې د پانګونې امکانات و ارزوي او هم د وزارت له فني او تخنیکې مسؤلینو سره له نژدې وګوري او په افغانستان کې د لمریزې برېښنا د تولید په برخه کې خپلې پروژي پلې کړي.

دیاد شرکت مسؤلینو دغه بلنه و منله او ژمنه یې وکړه چې په نژدې راتلونکي وخت کې به افغانستان ته سفر وکړي؛ تر څو د خپل شرکت لپاره د لمریزې برېښنا د تولید په برخه کې د پانګونې په هکله له مسؤلینو سره مفصلې خبرې وکړي.

دغه راز د افغانستان د اسلامي امارت د اوبو او انرژي سرپرست وزیر او مل پلاوي یې د سوډان لۀ پخواني لومړي وزیر

ښاغلي دکتور معتز سره وکتل، دوی د اوبو او انرژي په نړیوال سیاست باندې خبرې او د نظرونو تبادله وکړه.

ښاغلي معتز په دغه ناسته کې د اوبو د مدیریت او برېښنا د تولید په برخه کې خپلې تجربې شریکې کړي .

او هم یې زیاته کړه چې افغانستان د سوډان په پرتله په ښۀ وضعیت کې قرار لري او هیله ده چې تاسو به د خپلو هلو ځلو پۀ دوام سره په لږ وخت کې وکړای شئ چې د اوبو د مدیریت او بریښنا د تولید په برخه کې خپلو موخو ته ورسېږئ.