د اوبو او انرژي وزیر د کندهار ولایت د تیمور کانال د چارو له بهیر څخه لیدنه وکړه
۱۴۰۵/۴/۳۰ هـ.ش ۱۴۴۸/۲/۶ هـ.ق
د اوبو او انرژي محترم وزیر الحاج ملا محمد یونس آخندزاده صاحب، کندهار ولایت ته د خپل کاري سفر په ترڅ کې د یاد ولایت د میوند ولسوالي د تیمور کانال د بیارغونې او پاککارۍ له چارو څخه لیدنه وکړه.
محترم وزیر صاحب د یادې لیدنې پر مهال د پروژې د چارو پر چټکتیا او پر خپل ټاکلي وخت بشپړېدو باندې ټینګار وکړ، او اړوندو مسؤلینو ته یې د چارو د لا اغېزمن او غوره تطبیق لپاره لازمې سپارښتنې او لارښوونې وکړې.
د یادونې وړ ده، چې یاد کانال د یو سربند په درلودو سره، ۱ متر لوړوالی او ۲۶۰ متره اوږدوالی لري. د کانال ټولیز اوږدوالی ۱۱۷۰ متره، پراخوالی ۷.۵ متره او ژوروالی ۳.۵ متره دی، چې د شاوخوا ۱۸۳۹ هکټاره کرنیزې ځمکې د خړوبولو وړتیا لري.
له دغه کانال څخه به نږدې شل زره ( ۲۰،۰۰۰ )کورنۍ ګټه واخلي. د دې پروژې د جوړولو ټولیز لګښت شاوخوا ۱۱۰ میلیونه افغانۍ قرارداد شوی دی. دغه کانال د سیمې له مهمو اوبو لګولو سرچینو څخه شمېرل کېږي او د کرنیزو ځمکو په خړوبولو، د کرنیزو حاصلاتو په زیاتوالي او د سیمهییز اقتصاد په پیاوړتیا کې مهم رول لري.
