د اوبو او انرژي سرپرست وزیر د لوګر ولایت د ابتک بند له ساحې څخه لیدنه وکړه
د اوبو او انرژي سرپرست وزیر محترم الحاج ملا عبداللطیف منصور د لوګر ولایت په خوشي ولسوالي کې د ابتک بند له ساحې څخه لیدنه وکړه.
د اوبو او انرژي سرپرست وزیر د نوموړي بند له ساحې څخه د لیدنې پرمهال وویل چې دغه ساحه د خپل طبیعي جوړښت او موقعیت له کبله د بند جوړېدلو ته خورا مساعده ده او په لږ لګښت سره دلته بند جوړېدلای شي.
همدارنګه د اوبو او انرژي سرپرست وزیر لوګر ولایت ته د خپل سفر په بهیر کې د نوموړي ولایت له مرستیال والي محترم مولوي عنایت الله شجاع سره وکتل او په دغه ولایت کې یې د اوبو او انرژي پروژو اړوند موضوعاتو باندې خبرې، اترې وکړې.
په ورته مهال ښاغلي وزیر صاحب د لوګر د سیندیزې فرعي حوزې له رئيس محترم ملا محمد اسمعیل آخندزاده او کارمندانو سره هم وکتل او د نوموړې حوزې کارمندان یې په خپلو دندو او د خلکو د خدمت په لاره کې اخلاص ، صداقت او امانتداري ته وهڅول.
