د اوبو او انرژي سرپرست وزیر پکتیا ولایت ته په سفر ولاړ
د افغانستان د اسلامي امارت د اوبو او انرژي سرپرست وزیر محترم الحاج ملا عبداللطیف منصور په داسې حال کې چې د پکتیا سیندیزې فرعي حوزې رئيس محترم الحاج مولوي محمد کریم فاتح، د پکتیا ولایت د سرې میاشتې رئيس محترم مولوي ابو احمد، د چاپيریال ساتنې رئيس محترم مولوي عبدالهادي هدایت، د استخباراتو ریاست د پلټنو مدیر مولوي نعمان او یو شمېر مجاهدینو یې ملتیا کوله د خپلو ولایتي سفرونو په بهیر کې د پکتیا ولایت مربوط د خواځکو په کلي کې د روسي اشغالګرو او د وخت د کمونیست دولت پر ضد د وسله وال جهاد له لمړني مرکز څخه چې د خواځکو په کلي د مرحوم میرتلام اکا په کلا کې وو، لیدنه وکړه.
له هغه وروسته د خواځکو د قوم مشرانو د یوې ناستې په ترڅ کې د اوبو او برېښنا په برخه کې د خپلې سیمې ستونزې د اوبو او انرژي له محترم وزیر صاحب سره شریکې کړې، ښاغلي وزیر دوی ته ډاډ ورکړ چې د خپل مسؤلیت، متوازن انکشاف او شته امکاناتو په چوکاټ کې به د دوی ستونزو ته رسیدګي وشي.
غونډه د اسلامي نظام د دوام او استحکام او د ګران هېواد د سمسورتیا په دعا سره پای ته ورسېده.
