د اوبو او انرژي وزارت سرپرست وزیر د لغمان ولایت له مشرانو سره په یاد ولایت کې د شاهي کانال د پروژې په هکله خبرې وکړې
د اوبو او انرژي وزارت سرپرست وزیر ښاغلي ملا عبداللطیف منصور د لغمان ولایت له یو شمېر مشرانو سره وکتل او د لغمان ولایت د شاهي کانال پروژې د پاتې چارو د پلي کولو په هکله بحث او د اندونو تبادله وکړه.
په یاده لیدنه کې، د لغمان ولایت مشرانو د شاهي کانال پروژې د اهمیت او د دې پروژې پلي کولو ته د خلکو اړتیاوو په هکله خبرې وکړې او د یادې پروژې د پاتې چارو د بیا پيلولو غوښتنه يې وکړه.
د اوبو او انرژي وزارت سرپرست وزیر ښاغلي ملا عبداللطیف منصور د لغمان ولایت مشرانو ته ډاډ ورکړ چې د شاهي کانال پروژه د دې وزارت په کاري لومړیتوبونو کې دی.
ښاغلي منصور زیاته کړه چې د یادې پروژې د قرارداد په هکله لازمې څېړنې ترسره شوې او پایلې یې هم د افغانستان اسلامي امارت له اقتصادي کمیسیون سره شریکې شوې ترڅو اړینې لارې چارې د هغه د ستونزو په هوارولو کې عملي شي او چارې یې هر څه ژر په راتلونکي کې پیل شي.
د یادولو وړ ده، چې د لغمان ولایت د شاهي کانال پروژه د اوبو او انرژي وزارت له مهمو پروژو څخه ده چې په پلي کولو سره یې په لس ګونو زره هکتاره ځمکه به په یاد ولایت کې تر خړوبولو لاندې راشي.
