د اوبو او انرژۍ سرپرست وزیر د کمال خان بند څخه لیدنه وکړه
د ا.ا.ا داوبو او انرژي سرپرست وزیر ملا عبد اللطیف "منصور" او ورسره پلاوي، په داسې حال کې چې د نیمروز سېندیزې حوزې رئیس، سید محمد ولي "اغا" هم حضور درلود، د کمال خان بند څخه لیدنه وکړه.
د لیدنې پر مهال د نیمروز ولایت د سېندیزې حوزې رئیس د کمال خان بند په اړه هر اړخیز معلومات وړاندې کړل.
ښاغلي ملا عبداللطيف "منصور" د معلوماتو له اورېدو وروسته وويل، چې د کمال خان بند د پاتې کارونو بشپړول د دې وزارت د رهبرۍ له لومړيتوبونو څخه دي او هڅه به وکړل سي، چې د کمال خان بند پاتې چارې هم ژر تر ژره پيل شي.
د اوبو او انرژي وزیر دغه سفر په داسې حال کې نیمروز ولایت ته وکړ، چې تېره اونۍ د افغانستان کابینې د څو بندونو د ارزونې کمېټې ته لارښوونه وکړه، چې له بندونو څخه څارنه وکړي او خپل راپور بشپړ کړي.
د کمال خان بند د هېواد له مهمو او حیاتي بندونو څخه دی، چې د زرنج ښار په ۹۵ کیلومترۍ کې د دغه ولایت په چهاربرجک په ولسوالۍ کې موقعیت لري.
او همدا راز یاد بند ۱۷۴ زره هکتاره ځمکه خړوبوي.
