د سترو پروژو د څېړنې پلاوي د رهبري په ناسته کې د افغانستان برېښنا شرکت دوه نور ستر قراردادونه تر څېړنې او مطالعې لاندې ونیول شول
یاده ناسته د اوبو او انرژي وزارت د اوبو معین ښاغلي مجیب الرحمن عمر آخندزاده تر مشري لاندې د کلیو پراختیا، کرنې، ټولګټو، مالیې، اقتصاد وزارتونو د معینانو او استازو او د اوبو او انرژي وزارت او د افغانستان برېښنا شرکت د یو شمېر تخنیکي مسؤلیو په ګډون ترسره شوه.
په دې ناسته کې، د افغانستان برېښنا شرکت د پروژو دوه قراردادونه د یادو پروژو د وضعیت د معلومولو، روڼتیا، اصلاح او د هغوی د ستونزو د هوارولو په موخه و څېړل شول او یاد پلاوي د هغوی په هکله په هر اړخیزه توګه بحث او د اندونو تبادله وکړه.
د یادولو وړ ده، چې یاد پلاوی د افغانستان اسلامي امارت د کابینې له لوري ټاکل شوی، ترڅو ټول ستر قراردادونه تر څېړنې او مطالعې لاندې ونیسي او په پای کې د خپلې څېړنې پایلې په یوه بشپړ راپور کې د افغانستان اسلامي امارت اقتصادي کمیسیون ته وړاندې کړي.
