د شمال سیندیزې حوزې عمومي رئیس د نهرشاهي سربند څخه لیدنه وکړه
د شمال سیندیزې حوزې عمومي رئیس ښاغلي مولوي عبدالحکیم حاجي حکمت او تخنیکي ټیم يې د بلخ د سیندیزې فرعي حوزې له یو شمېر کارکوونکو سره د نهر شاهي سربند له ودانۍ، د یاد کانال د مسیر او د مزار شریف د سرې او برېښنا له تصدي ریاست څخه لیدنه وکړه.
د دې لیدنې په ترڅ کې، د شمال سیندیزی حوزې عمومي رئیس د بند مسوولينو ته هدایت ورکړ، چې باید د نوموړي سربند د وسایلو ساتنې او پالنې ته دوامداره او جدي پاملرنه وکړي.
د نهرشاهي سربند شاوخوا ٧١٠ هکتاره ځمکه خړوبوي . د غه کانال ٤.٣ کیلومتره اوږدوالی لري، او د نوموړي کانال د اوبو جریان اندازه په عادي حالت کې په یوه ثانیه کې ۴ متره مکعب او اعظمي اندازه یې په یوه ثانیه کې ۸ متره مکعب ده.
په ورته وخت کې، د شمال سیندیزی حوزې عمومي رئیس د مزارشریف د سرې او برېښنا د تصدي له رئيس سره هم وکتل او په بېلابېلو موضوعګانو باندې لکه د اوبو سټېشن، تولید، او د فابریکې د کلنې عوایدو په هکله یې هر اړخیزه خبرې وکړې.
د سرې او برېښنا د تصدي رئیس ښاغلي قاري خالد د شمال سیندیزې عمومي حوزې له رئيس سره په کتنه کې وویل چې په ٢٤ ساعتونو کې د نوموړي فابریکې د سرې له تولید څخه ٧ میلیونه ناخالص عوايد ترلاسه کیږی او دغه فابریکه څلور توربینونه لري چې د فابریکې او د استوګنې ښارګوټې ته بریښنا ورکوي
