په ارزګان ولایت کې به د آغا جان بند تر څنګ د څو نورو پروژو چارې پيل شي.
د اوبو چارو د تنظیم ملي ادارې عمومي رئيس ښاغلي انجنیر خان محمد تکل په خپل کاري دفتر کې د ارزګان ولایت والي ښاغلي عنایت محمد عمر شیرزاد سره وکتل او د اوبو پراختیایي پروژو د تطبیق په اړه یې هر اړخیز بحث وکړ.
په دغه لیدنه کې د ارزګان والي د دغه ولایت د ولسونو په استازیتوب له ښاغلي تکل سره مننه وکړه، چې د اوبو مدیریت پراختیایي پروژو د تطبیق په برخه کې اروزګان ولایت ته ځانګړې پاملرنه کوي او د اوبو چارو د تنظیم ملي ادارې کړنې او فعالیتونه یې وستايل.
وروسته د اوبو چارو د تنظیم ملي ادارې عمومي رئيس ښاغلي تکل د ارزګان ولایت والي ته په دغه ولایت کې د اوبو مدیریت پروژو په اړه معلومات ورکړل او زیاته یې کړه "په روان کال کې به په ارزګان ولایت کې د (آغا جان) بند تر څنګ د یو شمېر نورو پراختیایي پروژو چارې پيل شي، چې په دغه ولایت کې به په زرګونو خلکو ته د کار زمینه برابره کړي."
د یادونې وړ ده چې اوس مهال په ارزګان ولایت د اوبو چارو د تنظیم ملي ادارې لخوا د (سراب او شفلوغ) بندونو چارې روانې دي.
د اوبو چارو د تنظیم ملي اداره
