په انرژي سکتور کې د اجراآتو د څېړلو او د چارو د غوره پلي کولو په موخه د انرژي معینیت اداري ناسته ترسره شوه
یاده ناسته د اوبو او انرژي وزارت د دفتر عمومي رئيس او د انرژي معینیت وارسي کوونکی محترم قاري محمد عبدالعزیز "عزیز" په مشري د رئيسانو او د یاد معینیت د ټولو تخنیکي مسؤلینو په ګډون ترسره شوه.
په دې ناسته کې د هغو کړنو او موضوعاتو د اجراآتو په هکله چې په مخکنۍ ناسته کې یې په هکله لازمي پرېکړې شوې وي، په هر اړخیزه او بشپړه توګه تر څېړنې لاندې ونیول شوې او رئيسانو او تخنیکي مسؤلینو په دې ناسته کې د خپلو کړنو راپورونه وړاندې کړل.
د ناستې په دوام کې د څو اړینو اداري او تخنیکي موضوعاتو لکه د انرژي ماستر پلان، د پروژو لومړیتوب بندي، د انرژي سکتور د اجراآتو د ارزولو لپاره د مشخصي استراتیژي چمتو کولو، د افغانستان برېښنا شرکت سره د پروژو د پلي کولو په موخه د همغږي رامنځته کولو او د هېواد د انرژي د مدیریت په موخه د یوې بشپړې طرحې د چمتوکولو په هکله بحث او د اندونو تبادله ترسره شوه.
د وزارت د دفتر عمومي رئيس او د انرژي معینیت وارسي کوونکی محترم قاري محمد عبدالعزیز"عزیز" د انرژي سکتور د رئيسانو او متخصصینو د اندونو تر اورېدلو وروسته، د اجراآتو د ښه ترسره کولو په پار اړینې سپارښتنې او هدایات ور کړل او اړوندو مسؤلینو ته یې دنده وسپارله چې یاد موضوعات په ښه توګه پلي شي.
