د آمو سیند غاړو د تحکیماتو پروژې د چارو د چټکتیا په هکله د اوبو معینیت اونیزه تخنیکي ناسته ترسره شوه
یاده ناسته د اوبو او انرژي وزارت د اوبو معین ښاغلي مجیب الرحمن عمر آخندزاده ترمشري لاندې د رئيسانو، سلاکارانو او تخنیکي مسؤلینو په ګډون د یاد معینیت د غونډو په تالار کې ترسره شوه.
په دې ناسته کې د بېلابېلو موضوعاتو په ځانګړې توګه د آمو سیند ته څېرمه او تر اغېز لاندې ځمکو او کورونو د ساتنې په برخه کې د لا زیاتو ستونزو د رامنځته کېدو د مخنیوي په پار د اړینو تدابیرو د نیولو او همدارنګه د دې وزارت له خوا د چمتو شویو پلانونو د پلي کولو د څرنګوالي په هکله بحث او د اندونو تبادله ترسره شوه او اړین تصامیم ونیول شول.
د اوبو ښاغلي معین د ناستې په پای کې د موضوعاتو تر هر اړخیزې څېړنې وروسته، اړینې لارښوونې وکړې او د آمو سیند له زیانونو د اوښتولو د مخنیوي لپاره یې د پلانونو د ژر پلي کولو په موخه اړوندو ریاستونو ته مشخصې دندې وسپارلې او د چارو پر چټکتیا باندې یې ټینګار وکړ.
