د افغانستان برېښنا شرکت د مدیره پلاوي لمړي ناسته ترسره شوه
دا ناسته د اوبو او انرژي وزارت د سرپرست وزیر ښاغلي ملا عبداللطیف منصور، د وزارت د انرژي معین ښاغلي مولوي عارف الله عارف، د افغانستان برېښنا شرکت عمومي رئیس ښاغلي مولوي محمد عیسی آخوند، د مدیره پلاوي د ټولو غړو او د یاد شرکت یو شمېر مسؤلینو په ګډون د اوبو او انرژي وزارت د غونډو په تالار کې ترسره شوه
د اوبو او انرژي وزارت سرپرست ښاغلي ملا عبداللطیف منصور په دغه ناسته کې د افغانستان اسلامي امارت د بریا د یادولو ترڅنګ، د دې هیواد د آبادۍ او پراختیا په لاره کې هڅه د افغانستان د ټولو خلکو دنده یاده کړه.
په دغه ناسته کې د افغانستان برېښنا شرکت د کړنو په هکله، د ۱۴۰۱ مالي کال د تدارکاتي پلان چمتوکولو، د لویو پروژو د پلي کولو لپاره د یاد شرکت لخوا پر لازمو پرېکړو نیولو او د افغانستان برېښنا شرکت اړوند اجراآتو باندې بحث او دنظر تبادله وشوه.
ښاغلي منصور په خپلو خبرو کې څرګنده کړه: " په هیواد کې د انرژي سکتور پرمختګ د یاد سکتور دټولو مسؤلینو هڅې ته اړتیا لري، بنا اړینه ده چې ټول مسؤلین په یوه مشخصي تګ لارې او کلي پروګرام په هیواد کې د انرژي د پراختیا په لاره کې کار و کړي.
د اوبو او انرژي وزارت سرپرست د مدیره پلاوي او د افغانستان برېښنا شرکت له مسؤلینو څخه و غوښتل چې په هیواد کې د خدمتونو د وړاندې کولو او د انرژي د پراختیا لپاره جامع طرحه چمتو کړي، لکه څرنګه چې ټولې کړنې، ستونزې او ټول لازم موضوعګاني پکې مشخص او واضح وي.
د یادولو وړ ده، چې د افغانستان برېښنا شرکت مدیره پلاوی چې د یاد شرکت د مهمو پرېکړو نیونکی دی د اوبو او انرژي وزارت د سرپرست وزیر تر ریاست لاندې رامنځته شوي او پکي د دې وزارت د انرژي معین او د اقتصاد، ښارجوړونې او ځمکو، کانونو او صنایع وزارتونو استازي د غړي په توګه ګډون لري
